வாடாத பக்கங்கள்

வாடாத பக்கங்கள் - 8

2010-03-26T01:47:00.000-07:00

வணக்கம்.

வாடாத பக்கங்களின் முயற்சியையும், நோக்கத்தையும் பாராட்டி, மேலும் செழுமைப்படுத்தும் விதமாய் நண்பர் ந. கணேசன் அவர்கள் வலைமலர் என்னும் ஒரு குழுமம் துவங்கி இருக்கிறார்.

வாடாத பக்கங்களில் பகிரப்படும் பதிவுகள் குறித்து உரையாடல் நடத்த இந்தக் குழுமம் பயன்படும் என தெரிவித்திருக்கிறார். அவருக்கு நன்றிகள். விருப்பமுள்ளவர்கள் இங்கே இணையலாமே.

Subscribe to வலைமலர்

Email:

Visit this group

மிக்க நன்றி.

பரிந்துரைக்கப்பட்ட பதிவுகள்:..

பரிந்துரைத்தவர்: நேசமித்ரன்

1) முத்தமிடும் வியாபாரிகள் ( ursula)

கவிஞர் யவனிகா ஸ்ரீராமின் புதல்வர் ராகவன் தனக்கான புது மொழியுடன் எழுதிவரும் கவிதைகளில் கரிசல் வாசனையும் கரிம வாசனையும் சமவிகிதத்தில் கல்குதிரையில் வெளியான கவிதைகள் மூலம் கவனத்தை ஈர்த்தவர்.

2.நான் சந்தித்த கதைசொல்லிகள் (தீபா)

பால்யத்தின் தாழ்வாரத்தில் குழந்தைகளுக்கான குழந்தையின் குழந்தையாக இவரின் பதிவுகளும் பகிர்வுகளும் கடல் மீளும் அலை இழுக்கும் காலடி மணலின் பரவச வெளிக்கு அழைப்பவை .கணினி விளையாட்டுகளில் கார்ட்டூன் சித்திரங்களில் உலவும் கதைசொல்லிகளற்ற இன்றைய குழந்தையை முன்னிறுதி தம் பால்யத்தை வாசிப்பை பதிவு செய்திருக்கும் இடுகை இது.

3.பெரியாரும் லீனா மணிமேகலையும் (சுகுணா திவாகர்)

லீனா மணிமேகலையின் கவிதை மொழி குறித்த சகல சர்ச்சைகள் கலாசார ,ஒழுக்கத்திரைகள் eccentric பிம்பம் எல்லாம் கடந்து தந்தை பெரியாரின் பெண்ணியம், காமம் , நடத்தை, தார்மீக விதிகள், மீறல் முதலியன குறித்துப் பேசும் குடியரசு இதழின் பத்திகளை பதிவு செய்திருக்கிறார் கலகக்கார பிம்பம் உள்ள சுகுணாதிவாகர்.

பரிந்துரைத்தவர் : மாதவராஜ்

1. சில்ரன் ஆப் ஹெவன் இயக்குனர் மஜீத் மஜீதி (வண்ணத்துப்பூச்சியார்)

ஈரானிய இயக்குனரும், உலகம் முழுவதும் மனிதர்களை அற்புத குழந்தைளால் கொள்ளை கொண்டவருமான மஜித் மஜிதியைப் பற்றிய குறிப்புகளும், விவரங்களும். முக்கியமான தொகுப்பு.

2.முப்பது வரிகள் (நதியலை)

பார்சிலோனியாவில் பிறந்த ஸ்பெயின் நாட்டு கட்டலோனியா மொழி எழுத்தாளர் மான்சோவின் எழுத்துக்களிலிருந்து சுவாராசியமான ஓன்றை இங்கே மொழியாக்கம் செய்து தந்திருக்கிறார். நகைச்சுவை பொதிந்திருந்தாலும், எழுதுபவனின் கைகளுக்கும், இதயத்துக்கும், மூளைக்கும் நடக்கும் உரையாடல்களைப் போல நுட்பமான விஷயங்களைச் சொல்கிறது. எழுத்தின் பயணம். மிகவும் ரசித்த பதிவு இது.

3.உறவு (கென்)

கதை முடியாமல் வாசகனுக்குள் இறங்கி அலைக்கழிக்கிறது. தவிப்பு அடங்க மாட்டேன்கிறது. சூடு தணிக்க முடியாமல் பெரும் இரைச்சலோடு பெய்கிறது மழை. எறியும் சாப்பாட்டுத்தட்டு விதியை சபிக்கிறது. வாழ்விலிருந்து பிறந்த எழுத்துக்களுக்கு எத்தனை வலிமை!

4.வேப்ப மரமும் ஆத்தாவும் (ஆடுமாடு)

மொழியும் மனிதர்களும் வேறு வேறாக இல்லாமல் இருப்பது இவரது சிறப்பு என நினைக்கிறேன். சாமியார்கள் இல்லை இந்த ஆத்தாக்கள். புதிர்களை கொண்டையில் முடிந்து நம் கண்முன்னே நடமாடிக்கொண்டு இருக்கும் எளிய மனிதர்கள். நம் மரபின் வழியாக கிராமத்து ஆன்மாவும், நம்பிக்கையும் சொல்லப்படுகிறது.

வாடாத பக்கங்கள் -7

2010-03-23T07:13:00.000-07:00

வாடாத பக்கங்கள் இரண்டு வாரம் கழித்து மீண்டும்.

இந்த இடைப்பட்ட காலத்தில் பரிந்துரைக்கப்பட்ட பதிவுகள் இங்கே.

நண்பர்கள் பொறுத்தருளவும், ஒத்துழைக்கவும் வேண்டுகிறோம்.

பதிவு	குறிப்பு	பரிந்துரைத்தவர்
ஓடும் ரயிலில் நகராத கப்பல் (சரவணன்)	குழந்தைகளின் அற்புத உலகினிற்குள் எளிதாய் புகுந்து இலக்கியம் படைக்கும் சரவணனின் படைப்புகளில் மற்றுமொரு சிறந்த பதிவிது.	லேகா
அந்நியமாகும் ஆசைகள் (ராமசாமி)	பள்ளி பாடத்தில் படித்த அண்ணாவின் "செவ்வாழை" சிறுகதை ஒரு ஏழை சிறுவனின் ஏமாற்றத்தையும்,தொடர்ந்து ஒடுக்கபடும் விளிம்பு நிலையின் அவல நிலை குறித்தும் மட்டுமே உணர்த்தியது. ராமசாமி அய்யாவின் இப்பதிவு அக்கதையை கொண்டு அந்நியமாக்கல் கோட்பாடு உட்பட பல உள்ளார்ந்த விஷயங்களை தெளிவுபடுத்துகின்றது.	,,
வீழும் நினைவுகள் (தோழி)	சொல்லப்படாத,பேசப்படாத தருணங்களை,உணர்ந்தும் உணராத முகங்களை,தவிக்கும் உணர்வுகளை மிக அழகாக பதிகிறது கவிதை. செல்லக்கண்ணம்மா என கொஞ்ச தோணும் வரிகள். ஒரு வார்த்தையை முன்னவோ, பின்னவோ நகர்த்த முடியாத கச்சிதம்.	பா.ராஜாராம்
ஸ்டெல்லா புரூஸ் கவிதைகள் (சந்தனமுல்லை)	முல்லையின் இந்த கட்டுரை ரொம்ப பிடிச்சிருந்தது. ஸ்டெல்லா ப்ரூசின் கவிதை பகிரலில், பகிர்ந்த கவிதைகளைவிட இவரின் எழுத்தும் அது கொண்டு சேர்க்கும் இடங்களும் அனுபவப் பூர்வமானவை. நான் பெற்றேன் இன்பம்.	,,
எங்களது முதல் படம் (மாதவராஜ்)	பள்ளம் படம் பார்த்தேன். மாதவராஜ்,காமராஜ்,கார்த்தி போன்ற நண்பர்கள் எடுத்திருப்பார்கள் போல.என் அலுவல்கள் இடையே பார்த்து மிக சோர்ந்த பதிவு இது. இப்பவரையில் என்னால் இயங்க இயலவில்லை. நீங்க பார்க்கணும் மக்கா!	,,
வலியது உயிர்நிலை (ராகவன்)	தத்தெடுத்தலின் தடுமாற்றங்களை, அதன் வலியும் வேதனையும் வெளிப்படும் பதிவு இது.	வெயிலான்
உலகம் உய்ய...தண்ணீர் தினத்துக்காக (ராமலஷ்மி)	இராமலஷ்மி மேடம் அவர்களின் என்ற பதிவு படித்தேன். சின்ன சின்ன விஷயங்கள் என்றாலும் நாம் செய்ய வேண்டியவற்றை சரியாக தண்ணீர் தினம் வருவதை ஒட்டி விழிப்புணர்வு உண்டாக்க கூறியுள்ளது வரவேற்கத்தக்கது”. சமீபத்தில் பாண்டிச்சேரி சென்றிருந்த பொழுது அங்கு ஒரு சின்ன விழிப்புணர்வு விளம்பரம் காண நேர்ந்தது. மனம் நெகிழ்ந்துவிட்டது. குழாயில் தண்ணீர் சொட்டு சொட்டாக விழுந்து வாளி நிரம்பி வழிந்து கொண்டிருக்கும். ஒரு சின்ன குழந்தை வேகமாக ஓடி வந்து குழாயை இறுக மூடுவாள். “உங்களுக்கான தேவை நிறைந்துவிட்டது... எங்களுக்கு?” என்ற கேள்வியுடன் முடிந்த விளம்பரம் மனதை மிகவும் வருத்தியது. எந்த விஷயத்தில் நாம் அடுத்த தலைமுறைக்கு நல்லதை விட்டு செல்கிறோம் என்ற யோசனை தோன்றுவதைத் தவிர்க்க முடியவில்லை. இந்த பதிவுகள் மீண்டும் இந்த கேள்வியை நம்முன் வைக்கின்றன.	அமுதா
தனிமை எனக்கொரு போதிமரம் (பாலமுருகன்)	தனிமை பற்றிய இவரது பதிவு நமது உணர்வுகளை தட்டி எழுப்புவதைப்போலவே உள்ளது. நாமும் அந்தத் தனிமையினூடே சென்று வந்ததைப்போல் இருந்தது. நல்ல பதிவு. இதனையும் நான் 'வாடாத பக்ககங்களுக்காக' பரிந்துரைக்கிறேன். நான் இந்த இடுகையை இப்போதுதான் முதல் முறையாக படிக்கிறேன். இதை எழுதுபவரது விபரம் எனக்குத் தெரியாது.	ஜெயந்தி
நெருப்பில்லாமல் புகைகிறது (சித்ரன்)	சிகரெட் புகைப்பதைப் பற்றி நேர்மையான ஒரு கட்டுரை. எல்லாப் பரிமாணத்தையும் அலசி இருக்கிறது.	வடகரை வேலன்
கர்ணமோட்சம் (பிரசன்னா இராசன்)	அருமை...அருமை..என் வாழ்வின் மகத்தான சில விநாடிகள். வேறென்ன சொல்வது? கர்ண மோட்சம் எ‌ன்ற இந்த குறும்படத்தை சமீபத்தில் கேள்விப்பட்டு இங்கு வந்தேன். அப்படியே அந்த வலைப்பூவில் நின்று விட்டேன்.அ‌ங்கிருந்து மீண்டு வர இயலவில்லை. அறிமுகப்படுத்திய பிரசன்னா இராசனுக்கு நன்றி. முரளிக்கு என்ன சொல்வதென்றே தெரியவில்லை.	விநாயகம் முருகன்
தோழர் (ஆடுமாடு)	சட்டென இவரது எழுத்துக்கள் வாசகனின் கரம்கோர்த்து பயணிக்கிறது. லட்சியங்களுக்கும், லௌகீக வாழ்வுக்கும் இடையில் செல்லும் கதை பெரும் அவஸ்தைக்குள்ளாக்குகிறது. இழப்பின் வேதனை நிறைகிறது.	மாதவராஜ்
தண்டவாளம் விட்டு இறங்காத ரயிலும், செவத்திக் கிழவியின் கனவும் (காமராஜ்)	கரிசல் மண் மணக்கும் ஆர்ப்பாட்டமில்லாத எழுத்தில் கிராமத்து வெள்ளந்தி மனிதர்களை அறியமுடியும். புழுதி படிந்த மனிதர்களின் வாழ்வையும், அவர்கள் வலியையும் இங்கே தரிசிக்கலாம். ஸ்பரிசிக்கலாம்.	,,
என் காதலி மற்றும் நான் (முரளிகுமார் பத்மநாபன்)	My Girl & I என்னும் கொரியப் படத்தினைப் பற்றிய விவரிப்பு. கவிதையாய் மனதில் தேங்குகிறது. கடலலையின் இரைச்சலோடு முதற்காதலின் நினைவுகள் ததும்புகின்றன.	,,
அனுரனன் வங்காளப்படம் (லேகா)	நுட்பமான உணர்வுகளையும், உறவுகளையும் சித்தரிக்கும் இந்த வங்காளத் திரைப்படத்தினை மெல்லிய, அமைதியான குரலில் சொல்கிறார் லேகா. கஞ்சன் ஜங்கா மலையைப் பற்றிய விவரிப்புகள், இந்தப் படத்தைப் பார்க்காமல் விட்டு விட்டோமே என நம்மை விரட்டும்.	,,
கனவு (அமுதா)	எளிய வார்த்தைகளில் தொலையும் நம் வாழ்வைச் சொல்லும் கவிதை. குழந்தைகளின் உலகம் வசீகரமாய், கனவாய் விரிகிறது.	,,
இன்னொரு மழை (சேரல்)	குழந்தை போன்ற சிறிய, அழகான கவிதை. மழை எதற்காக பெய்கிறது என்று எவ்வளவு கொஞ்சியபடி சொல்கிறார். நனைந்துகொண்டே இருக்கலாம் கவிதையின் அர்த்தங்களில்!	,,
ஒன்றுசேர்ந்த (க.பாலாசி)	வட்டார மொழியில், பழமொழிகள் சினிமாப்பாடல்கல் எல்லாம் சேர்த்து கூட்டாஞ்சோறு போல பொங்கியிருக்கிறார். ரசித்து, ரசித்துப் படிக்கலாம். பதிவு தரும் அர்த்தங்களோடு முரண்பாடுகள் இருப்பினும்…	,,
துறவிக்காமம் (விநாயகம் முருகன்)	இந்த விநாயக முருகனை என்ன செய்யலாம் என யோசித்துக் கொண்டு இருக்கிறேன். நித்யானந்தா பற்றி பல பதிவுகள் வந்திருக்க, இந்தக் கவிஞன் சடேலேன மனதின் அழுக்குகளை தெருவில் போட்டு உடைக்கிறார். எள்ளலும், நையாண்டியும் தொனித்தாலும் சுயவிமர்சனமிக்க கவிதை. ‘யாரடா மனிதன் இங்கே’ என விநாயக முருகன் கேட்கிறார். சொல்லுங்கள் மக்களே!	,,
சரிகை வண்ணத்துப்பூச்சி (வேல்கண்ணன்)	கவிதானுபவம் என்னவென்றால், இந்தக் கவிதைதான். கவிஞன் இங்கே வண்ணத்துப் பூச்சியாகிப் போகிறான். அருமை.	,,
யஹி ஹே ரைட் சாய்ஸ் பேபி (சந்தன முல்லை)	வலைப்பக்கங்களில் முக்கியமான பதிவர் சந்தனமுல்லை என்பதை அனைவருக்கும் உணர்த்துகிற பதிவு இது. குழந்தை உலகம், நுட்பமான உணர்வுகள் மிக்க அனுபவங்கள் என பகிர்ந்த இவர், உலகின் முக்கியப் பிரச்சினை குறித்து ஆழமாகவும், வாழ்வின் காட்சிகளோடு சரளமாகவும் விவரிக்கிறார். இரண்டு மூன்று முறை படித்தேன்.	,,
வாழ்தலறம் (ராகவன்)	இதுவும் முக்கியமான கவிதானுபவம். காற்றின் தீராத பக்கங்களில் எழுதிச் சென்ற பிரமிளின் இறகை எடுத்து வைத்துக்கொண்டு தனது பக்கம் ஒன்றில் எழுதி இருக்கிறார்.	,,
தலைப்புணைக் கொளினே (முனைவர். குணசீலன்)	தமிழின் அற்புதங்களை எடுத்துக் காட்டிக்கொண்டே இருக்கும் முக்கியப் பதிவர் குணசீலன். பழந்தமிழ் இலக்கியத்தின் சுவையை திகட்டாமல் சொல்லிக்கொண்டே இருக்கிறார். கவிஞர் வைரமுத்துவின் கவிதையின் கூறுகளைக் கொண்ட சங்க இலக்கியத்தின் குறுந்தொகைப் பாடலை இங்கே விவரிக்கிறார்.	,,
நுகத்தடி மாடுகள் (ரிஷபன்)	படித்து முடித்தபோது கண்கலங்கிப் போயிருந்தேன். பணம் மனிதர்களோடு எப்படியெல்லாம் விளையாடுகிறது, அலைக்கழிக்கிறது, சுயத்தை இழக்க வைக்கிறது என்பதை சொல்லாமல் சொல்லும் அருமையான கதை. ரிஷபனை “ஏ மனுஷா!” எனக் கூவி அழைக்கணும் போலிருந்தது.	,,
கலைந்து கொண்டே இருக்கும் வீடுகள் (அன்புடன் அருணா)	தோற்றங்களும், காட்சிகளும் மாறி மாறி அடுக்கப்பட்டுச் செல்லும் கால ஓட்டத்தில், வீடுகள் எப்படியெல்லாம் கலைந்து போகின்றன என்பதைச் சொல்கிறது. நினைவுகள் கலையாமல் இருக்கின்றன இப்படி கவிதைகளாக.	,,

அறிவிப்பு - 1

2010-03-07T21:03:00.001-08:00

’சென்றிடுவீர் எட்டுத்திக்கும்’ என்னும் நல்ல நோக்கத்துடன்தான் இந்த வாடாத பக்கங்களைத் துவங்கினோம்.

ஆதரவு தெரிவித்து வந்த நண்பர்கள் கண்டு உற்சாகமாயிருந்தது.

ஆனால், நண்பர்கள் தாங்கள் படித்து, ரசித்த பதிவுகளைக் குறிப்பிடுவது மிகக் குறைவாகவே இருக்கிறது. ஒருசில நண்பர்களே தொடர்ந்து செய்து வருகின்றனர்.

நல்ல பதிவைப் படித்ததும், அதற்கு பின்னூட்டமோ, ஓட்டோ போடுவது போல, வாடாத பூக்களுக்கும் தெரிவிக்க வேண்டுகிறோம்.

இல்லையென்றால், எங்களைப் போன்ற மிகச் சிலரின் ரசனையையும், விருப்பத்தையும் பொறுத்தே அமையும்.

இன்னும் என்னவெல்லாம் செய்யலாம் என யோசனைகளையும் தெரிவியுங்கள். இது உங்கள் பக்கங்கள்.

நாளை, வாடாத பக்கங்கள் - 7 பூக்கும்.

வாடாத பக்கங்கள் - 6

2010-02-27T02:45:00.001-08:00

இந்த தடவை சில கேள்விகளோடு இந்த பக்கத்தை துவக்குவோம் எனத் தோன்றுகிறது.

1.சமீபத்தில் நார்வேயிலிருந்து வெளிவந்த தமிழ்நாவல் ‘பூவரசம் பூக்கள்’ எழுதியவர் யார்?
2. ‘பிறகொரு இரவு’ சிறுகதைத் தொகுதியின் ஆசிரியர் யார்?
3.‘அக்கினிப்பிரவேசம்’ என்னும் தலைப்பில் தமிழில் சிறுகதை எழுதிய மிக முக்கியமான தமிழ் எழுத்தாளர்கள் யார் யார்?
4.1981ல் வெளிவந்த ‘புதுக்கவிதை ஒரு புதுப்பார்வை’ என்னும் நூலின் ஆசரியர் சமீபத்தில் காலமானார். அவர் பெயர் என்ன?
5.‘நான்காயிரம் கைகளும் ஒரே முகமும்’ நூலின் ஆசிரியர் யார்?
6.‘இழந்த பின்னும் இருக்கும் உலகம்’ யாருடைய கட்டுரைத் தொகுதி?
7.‘வீடியோ மரியம்மன்’ சிறுகதைத் தொகுதியின் ஆசிரியர் யார்?
8.‘மஹ்மூத் தர்வீஷ்’ கவிதைகளை தமிழில் மொழிபெயர்த்தவர் யார்?
9.சை.பீர் முகம்மதின் சிறுகதைத் தொகுப்பின் பெயர் என்ன?
10.‘இதற்குத்தானே ஆசைப்பட்டாய்’ என்ற சொற்றொடர் சட்டென உங்கள் நினைவுக்கு எந்த நாவலைக் கொண்டு வருகிறது?

விடைகள் அடுத்த பதிவில்.

இனி, அவரவர்க்கு பிடித்த பக்கங்கள்....

பதிவு	குறிப்பு	பரிந்துரைத்தவர்
1. குடை பிடித்தவனைக் கொன்றுவிட்டார்கள் (நாவிஷ் செந்தில்குமார்)	மெல்லிய திடுக்கிடலோடு இப்படி அதிர்வுகளோடு ஆரம்பிக்கிறது இந்த கவிதை... கவிதையின் முடிவில் சட்டென சோகம் வ‌ந்து அப்பிக்கொள்கிறது.படித்து பாருங்கள். உங்களுக்கு பிடிக்கலாம். வேளச்சேரி பாரதிநகரில் கொலை நிகழ்வுகள் அரங்கேறியிருக்கின்றன கடந்த வாரத்தில் நான் ஊரில் இல்லாத சனி ஞாயிறு அன்று தெரியாதவர்கள் உள்ளிட்ட எனக்குப் பரிட்சயமான நண்பர்களும் சாகடிக்கப்பட்டிருக்கிறார்கள்	என்.விநாயக முருகன்
1. பெயர்கள் (ஜ்யோவ்ராம் சுந்தர்)		பா.ராஜாராம்
1 தலைப்பு கவிதையிலேயே உள்ளது 2.மிஸ்டுகால் ரிங்டோன்	கோவை சூலூரைச் சேர்ந்த மதன் தற்பொழுது வசிப்பது பெங்களூரில். அவரது கவிதைகள் நிதர்சன்மானவைகளாகவும் மொழியை சிடுக்காக்கும் தொழில்னுட்பம் ஏதுமற்றனவாகவும் இருக்கும்	வடகரைவேலன்
1. ஒரு பக்கம்: கடவுள்களின் கார்னிவெல் (ஸ்ரீதர் நாராயணன்)	அமெரிக்கக் கடவுள்களையும் கோவில்களையும் பற்றினதொரு பக்தி அதிகம் கலக்காத சுவாரசியமான கட்டுரை. :-)	சுரேஷ் கண்ணன்
1. பொழுதோட்டல் (பத்மா)	கேள்விக‌ளை புதிராக‌ சில‌ந்தி பின்னும் வலை என்ற‌ ப‌டிம‌மாக‌ சொல்லி இருப்ப‌து அழ‌கு	லாவண்யா
1. வலையப்பட்டி தவிலே (வித்யா)	நரேஷ் ஐயரை பற்றி எழுதிய மிக அழகான பதிவு.	Rajalakshmi Pakkirisamy
1.புத்தகம் மூன்றாம் பார்வை	நண்பர்கள் சேரல், ஞானசேகர், பீமொர்கன் ஆகியோர் தாங்கள் படிக்கும் புத்தகங்கள் குறித்துப் பகிர்ந்து கொள்கிறார்கள். அவர்களுடைய முயற்சி பாராட்டுக்குரியது. தி ஜாவின் மோகமுள் குறித்த நண்பர் ஞானசேகரின் சமீபத்திய பதிவு அருமையாக இருந்தது. புத்தகம் பற்றிய தகவல்கள் வேண்டுவோர் கண்டிப்பாக இவர்களுடைய வலைப்பூவில் தேடித் பார்க்கலாம்.	கிருஷ்ணபிரபு
2.அழியாச் சுடர்கள் (ராம்)	நண்பர் ராமின் இந்த வலைப்பூ தீவிர தமிழ்ச் சிறுகதை வாசகர்களுக்கு அருமையான வேட்டை என்றுதான் சொல்ல வேண்டும். முக்கியமான படைப்பாளிகளின் அறிய சிறுகதைகளைத் தேடித் தேடி தொகுக்கிறார். அதுமட்டுமில்லாமல் அவற்றை இணைய வாசகர்களின் கவனத்திற்கும் கொண்டுசெல்கிறார். மூத்த படைப்பாளிகளின் பல கதைகளைப் படிக்க இவருடைய வலைப்பூவிற்குச் செல்லலாம்.	,,
1.சிற்றிதழ்களின் முகவரி (நிலா ரசிகன்)	தமிழில் வந்த பல சிற்றிதழ்களின் முகவரிகளைத் தொகுத்திருக்கிறார். நல்ல முயற்சி.	மாதவராஜ்
2. பாட்டிகளும் அத்தைகளும் மற்றும் அந்நியப்பட்டுப் போன குழந்தைகளும் (கார்த்திகா வாசுதேவன்)	நினைவுகளின் பாதையில், திரும்ப மனமில்லாமல் செல்லும் அனுபவம். வண்ணதாசன், வண்ணநிலவன் ஆகியோரர் எழுத்தின் வசீகரம் இருக்கிறது. ரசிக்கலாம் இதுபோல…. அங்கமர்ந்து தான் நான் பல ஆண்டுகள் பரீட்சைக்குப் படித்தேன் ,கதவில் சாய்ந்து அமர்ந்து கொண்டு முன்புற டெலிபோன் ஸ்டாண்ட் தாங்கி நுனியை காலால் இடறிக் கொண்டே எத்தனை மணி நேரங்கள் படித்தாலும் அலுக்கவே அலுக்காது.	,,
3. நினைவுகள் நிறைகுகை (சுகிர்தா)	இப்படி இந்தப் பதிவைப் பற்றிச் சொல்கிறார் கவிஞர் யாத்ரா! ரொம்ப நல்லா எழுதியிருக்கீங்க சுகி, மனதை கவனித்தல், அதன் போக்கை துல்லியமாய் படம் பிடித்தது போன்று எழுதுதலை நிறைவாய் செய்திருக்கிறீர்கள். மனதின் அனுபவம் வார்த்தைகளில் மிகத் தெளிவாய் பதிவாகியிருக்கிறது	,,
4.துரியோதனன் துயில் (toto)	மகாபாரதத்தில் ஒரு முக்கியமான புள்ளியை மறுவாசிப்பு செய்கிறது.	,,
5.தெளிவு (விநாயக முருகன்)	இவரது கவிதைகள் எப்போதுமே ஒரு எள்ளலுடன் முடிவடைந்தாலும், முடிவடையாமல் நீள்கிறது நமக்குள் சிதறியபடி.	,,
6. இது முனிரத்தினத்தின் கதை (முத்துலெட்சுமியின் கதையும் தான்) – (சந்தனமுல்லை)	முதிர்கன்னியான ஒரு பெண் குறித்த வலி தரும் சித்திரம் இது. இயல்பான மொழியில் நம்மை நெகிழ வைக்கிறது.	,,
7. முற்றுப் பெறாமலே (ரிஷபன்)	நல்ல கவிதை. வார்த்தைகளை செதுக்கினால் இன்னும் சிறப்பாக வந்திருக்கக் கூடியது எனவும் தோன்றுகிறது.	,,
8.கவிதை புரியும் கணம் எம்.யுவன் - (ஜ்யோவ்ராம் சுந்தர்)	கவிதைகள் குறித்த புரிதல்களை ஏற்படுத்தும் நோக்கில் விவாதங்களை முன்வைக்கிற முக்கியமான பதிவு. கவிதை எழுதும், வாசிக்கும் பதிவர்கள் நிரம்பியிருக்கும் வலைப்பக்கங்களில், இந்தப் பதிவு கவனமும், கருத்துக்களும் பெற வேண்டும் என நினக்கிறேன்,	,,

உங்கள் கருத்துக்களுக்கும், விவாதங்களுக்கும் காத்திருக்கிறோம்.

வாடாத பக்கங்கள் –5

2010-02-23T05:46:00.001-08:00

புதுமைப்பித்தன் இப்படிச் சொல்லலாம்தான். தன் எழுத்துக்களின் மீது அவ்வளவு நம்பிக்கையும், மரியாதையும் அவருக்கு இருந்திருக்கிறது!.

விமரிசகர்களுக்கு ஒரு வார்த்தை. வேதாந்திகள் கைக்குள் சிக்காத கடவுள் மாதிரிதான் நான் பிறப்பித்து விட்டவைகளும். அவை உங்கள் அளவுகோல்களுக்குள் அடைபடாதிருந்தால் நானும் பொறுப்பாளியல்ல. நான் பிறப்பித்து விளையாட விட்டுள்ள ஜீவராசிகளும் பொறுப்பாளிகளல்ல. உங்கள் அளவுகோல்களைத்தான் என் கதைகளின் அருகில் வைத்து அளந்து பார்த்துக் கொள்ளுகிறீர்கள் என்று உங்களுக்குச் சொல்லிவிட விரும்புகிறேன்.

விமர்சனம் செய்கிறவர்களும், விமர்சனம் செய்யப்படுகிறவர்களும் இதுகுறித்து யோசிக்க வேண்டும்தான்.

இந்தமுறை வாடாத பக்கங்களுக்கு பல நண்பர்கள் தங்களுக்குப் பிடித்த பதிவுகளை பரிந்துரை செய்திருக்கிறார்கள்.

எஸ் வி வேணுகோபாலன்:

இதெல்லாம் நமது வேலையில்லை என்று பொதுவான மனிதர்கள் கை கழுவிவிட்டு நகர்ந்து விடுகிற, இதையெல்லாம் சொல்ல மனிதர்கள் இருக்கின்றார்களா என்று வாசிப்பவர்கள் உற்சாகமும், ஆறுதலும் கொள்கிற வலைப்பூக்கள் வணக்கத்திற்குரியவை. புதுவை எஸ் ராம்கோபால் என்ற அன்பரின் வலைப்பூ அம்மாதிரியான ஒன்று. பாசிஸ்ட் சித்திரவதைக்கு ஆட்படுத்தப்படுகிறோம் என்று அறியாத ஏராளமான குழந்தைகள் மேற்கொள்ளும் இறுதிப் பயணத்தில் உண்மை தெரிந்தாலும் அவர்களை கலவரப்படுத்தாமல் அன்பு மழை பெய்து உடன் செல்லும் ஜானூஸ் கோர்சாக் பற்றி நீங்கள் தெரிந்து கொண்டாக வேண்டும். குழந்தைகளது உளவியல் குறித்த தேர்ச்சியான அந்த மனிதரது ஒரு சில வரிகள் இங்கே, மற்றவை வலைப்பூவில்.

குழந்தைகள் நாளைய மனிதர்கள் அல்ல; மாறாக அவர்கள் இன்றையவர்கள். அவர்களை கவனிக்கவும், கனிவுடனும், மரியாதையுடனும் பழகவும் கோர அவர்களுக்கு உரிமை உண்டு. அவர்களின் அறியாமையை மதிக்க நாம் கற்க வேண்டும். 'நீங்கள் இன்னும் வளரவேண்டும்; பாருங்கள், நாங்கள் சொல்வதை கேளுங்கள்' என்பதை மட்டும் அவர்களிடம் சொல்லாதீர்கள். அவ்வாறு சொல்லும்போது குழந்தைகள் நாம் ஒன்றுக்கும் பயனில்லை, நாம் எப்போது வளர்வோம் என்கிற ஏக்கத்தை நீங்களே வளர்க்காதீர்கள்

சந்தனமுல்லை:

ஈழத்திரைப்படத்தின் திரை விமர்சனம். தமிழினம் சபிக்கப்பட்ட இனமா என்ற கேள்வி மனதை அறுத்துக்கொண்டிருக்கிறது. தமிழ்நாட்டில் இப்படத்தை வெளியிட முயற்சி செய்தால் நலம்.

ஆடுமாடு:

தமிழ் செம்மொழி மாநாடு நடைபெற இருக்கும் இக்காலகட்டத்தில் அது குறித்த வரலாறு, அதற்கான ஆதாரங்கள் பற்றி விளக்கமாக, ஆவணமாக அறிந்திருந்தல் அவசியம். நமக்கான பண்பாட்டுக்கூறுகள், செம்மொழிக்கான வரையறை என்பது என்ன, நம்மண்ணுக்கும் நமக்குமான மரபுகளை கொண்ட மொழியாக தமிழ் எப்படியானது போன்ற விஷயங்களை தெரிந்திருப்பது நமக்கான அறியாமையை விலக செய்யும். கல்வியாளர்களால் அல்லது புலமை வாய்ந்தவர்களால் பேசப்பட்டு வந்த இவ்விஷயம் பற்றி விரிவான ஆய்வை வழங்கியுள்ளார் முனைவர் நா. கணேசன்.

படித்த நாவல், கதைகளை நம்மோடு புதைத்துக்கொள்ளாமல் அதுகுறித்தான தனது மன ஓட்டங்களை, பாதித்த விஷயத்தை தோழமையோடு பகிர்ந்துகொள்வது அடுத்த ஆக்கத்துக்கான, அல்லது ஆரோக்கியமான விவாதத்துக்கான பாதையாக இருக்கும். குறைந்தபட்சம் கதைசொல்லியின் சிந்தனைக்கும் நம் சிந்தனைக்குமான தொடர்புகளை அறிவதற்காகக்கூட இதை பயன்படுத்தலாம். அப்படி, தாம் படித்த நாவல், கதைகளின் கதை மாந்தர்கள் பற்றி தொடர்ந்து எழுதிவருகிறார் பேராசிரியர் அ.ராமசாமி.

ஒரு பதிவில், தோப்பில் முகமது மீரானின், 'அஞ்சுவண்ணம் தெரு' பற்றி எழுதும் போது, இப்படி குறிப்பிடுகிறார்:

''பேச்சு மொழியை அதிகம் பயன்படுத்தி விட வேண்டும் என்ற விருப்பம் காரணமாக வட்டார மொழிக்குத் தரும் அதிக முக்கியத்துவத்தால் மீரானின் எழுத்துக்கள் எப்போதும் வாசிப்பு வேகத்தை மட்டுப் படுத்தி தடைகளை எழுப்பும் இயல்பு கொண்டவை''

படைப்பின் ஆழத்தை அதிகரிக்க, வட்டார வழக்கு என்பது முக்கியமானதாகப் படுகிறது. ஒரு முறை கி.ரா, 'வட்டார வழக்கிலான கட்டுரை' என்றதற்கு, ' மொழி, பேச்சு வழக்கை தாங்கி வந்த பிறகு அது கட்டுரையாகாது. கட்டுரையின் இடையில் இடம்பெற்றாலும அதன் வடிவம் கதையாகவே மாறிவிடுகிறது' என்றார்.

இந்த அடிப்படையில் கொள்ளாவிட்டால் கூட, மீரானின் படைப்புகள் இந்த வழக்குச் சொற்களிற்காகவே அதிகமாக ஏற்றுக் கொள்ளப்பட்டதாக கருதுகிறேன்.

வடகரைவேலன்:

சென்ற புதன் மணமாலை சூடிய அருமைத் தம்பி யாத்ராவின் கவிதை ஒன்று ஊமைப் ப்ரியம். மேம்போக்காகப் படித்தால் ஒரு ஸ்டிக்கர் பொட்டை வைத்து எழுதியதென்றாலும் பல்வேறு படிமங்களைத் தருகிறது இக்கவிதை. இதேபோல யாத்ரா எழுதிய தரை என்ற கவிதையும் பிரமாதமான ஒன்று

சிறந்த நடிப்பிற்கு இலக்கணமாகத் திகழும் மோகன்லாலும், சிறந்த திரைப்பட இயக்குனருமான பிளஸ்ஸியும் சேர்ந்து கொடுத்த சிறந்த படமான தன்மத்ராவிற்குப் பின் இந்த இணையின் மீண்டுமொரு படைப்பு பிரம்மரம். மலையாளத் திரைப்படங்கள் குறித்த நல்ல பார்வையுடன் அறிமுகம் செய்துவரும் நாஞ்சில் பிரதாப்பின் பதிவு .

Rajalakshmi:

வித்யாவின் ரத்தக்கறை என்னை கவர்ந்த ஒரு பதிவு. மிகவும் ரசித்தேன். எப்போதும் எழுதும் காமடியில் இருந்து விலகி விட்டாரோ என்று என்னை ஒரு நொடி யோசிக்க வைத்து விட்டார்.

I promise என்று ஆதி அவர்கள் சொல்லி அதை இராகவன் நைஜிரியா மற்றும் வெண்பூ அவர்களும் வழி மொழிய, படிக்கும் அனைவரும் வழி மொழிந்தால் நன்றாக இருக்கும் என என்னை நினைக்க வைத்த பதிவு இது.

ராம்ஜி:

பெண்ணினம் இருக்கும் திசை நோக்கி…

கோனார் நோட்ஸ் – யார் இந்தக் கோனார்

(பதிவைப் பற்றி குறிப்புகளை பதிவர் ராம்ஜி தரவில்லை)

மாதவராஜ்:

பழையவை தொந்தரவாய் இருப்பினும், அதன் நினைவுகள் சுகமானவை என்னும் அகவிதைகளின் சாலை படிக்க வேண்டிய கவிதை. இதுபோன்ற பொருளில் ஏற்கனவே எழுதப்பட்டு இருப்பினும் இன்னும் வார்த்தைகளை செறிவாக்கியிருந்தால் மேலும் நன்றாக வந்திருக்கும் எனத் தோன்றியது.

ராகவனின் பூனைக்கு அவனென்று பெயர்.. என்னும் கவிதை ரசித்து ஒரு கள்ளப்புன்னகை பூக்க வைக்கிறது.

totoவின் சற்றுமுன், வியாழக்கிழமை வேட்டை இரண்டுமே குறிப்பிட வேண்டியவை. ரசிக்க முடிகிறது. கவிதையின் தளத்துக்குச் செல்ல இன்னும் எதோ கவிதை வேண்டுவது போல் இருக்கிறது.

வண்ணத்துப்பூச்சியாரின் The Pope's Toilet திரைப்பட விமர்சனம் முக்கியமான பதிவு. அவரது வார்த்தைகளிலேயே:

ஊடகங்களின் அதீத கற்பனையும் விளம்பரமும் ஒரு ஊரின் வாழ்வாதாரத்தையே சூறையாடி விட்டது. பொறுப்பு வாய்ந்த ஊடகங்களின் பொறுப்பற்ற விளம்பர மோகத்தால் தமது வாழ்நாள் முழுவதும் உழைத்து வட்டி கட்ட வேண்டிய நிலைமைக்கு ஆளாகின்றனர். இதற்கு யார் பொறுப்பாக முடியும் என்ற கேள்வியோடு திரைப்படம் முடிகிறது.

அய்யனாரின் கடினத்திலிருந்து நீர்மைக்கு என்னும் இந்தப் பதிவு, நவீன வாழ்வில் தன் அடையாளத்தையும், இருப்பையும் காண எத்தனிப்பதோடு, தனது நான் பற்றிய புரிதலுக்கு இழுத்துச் செல்லும் ஒரு மனிதனின் சிந்தனைக் குறிப்புகள். அவசியம் படிக்கலாம்.

லாவண்யாவின் உறங்க மறுக்கும் உரையாடல்கள் அருமையான கவிதை.

வேல்கண்னனின் அவரைப் பற்றி நல்ல சொற்சித்திரம்.

பதிவர் நேசமித்ரனோடு கவிதைகள் குறித்து உரையாடலை பதிவாகி இருக்கிறார் கார்த்திகை பாண்டியன். உரையாடல் ஆரம்பிக்கும் முன்னாலேயே நின்று போனது போல் இருக்கிறது. மேலும் இதுகுறித்து பேசுவதற்கு நிறைய இருப்பதை உணர முடிகிறது.

நண்பர்கள் இந்தப் பதிவுகள் குறித்த விமர்சனங்களை, கருத்துக்களை இங்கே பின்னூட்டமாகத் தெரிவிக்கலாம். பிடித்தமான பதிவுகளை இந்த மெயில்களுக்கு அனுப்பித் தெரிவிக்கலாம்.

jothi.mraj@gmail.com

vadakaraivelan@gmail.com

வாடாத பக்கங்கள் -4

2010-02-21T20:24:00.001-08:00

‘வாடாத பக்கங்கள் ஒரு திரட்டியாக செயல்படுகிறதோ என்னும் சந்தேகம் வந்திருக்கலாம், அதனால்தான் இங்கு கருத்துப் பரிமாற்றங்கள் அதிகமாக நிகழாமல் இருக்கலாம்’ என்பதாக குப்பன் யாஹூ அவர்கள் ஒரு கருத்து தெரிவித்திருந்தார். இந்த வலைப்பக்கம் ஒரு திரட்டி போல இருந்துவிடக்கூடாது என்பதுதான் நமது விருப்பமும்.

திரட்டிகள், எழுதப்படுகிற அனைத்துப் பதிவுகளையும் உடனுக்குடன் திரட்டுகின்றன. வாடாத பக்கங்கள் அதுவல்ல. அதற்குமல்ல. தாங்கள் படித்த, ரசித்த பதிவுகளை இங்கே நண்பர்கள் அறிமுகப்படுத்த்லாம். ஏன் பிடித்திருக்கிறது எனச் சொல்லலாம். அது குறித்து கருத்துப் பரிமாற்றங்களை பின்னூட்டங்களில் தெரியப்படுத்தலாம். ஒரு உரையாடல்களுக்கான் வெளியை உருவாக்கலாம். இதுதான் நமது நோக்கம். சரியாக இது நடைமுறைப்படுத்தப்பட்டால் திரட்டிக்கும், வாடாத பக்கங்களுக்குமான வித்தியாசங்களும் தெளிவாகும் என நம்புகிறேன்.

அப்படியொரு விவாதத்தை இங்கே விநாயக முருகன் துவங்கி இருக்கிறார். முதலில் அதைப் பார்ப்போம்.

விநாயக முருகன்:

வா.மு.கோமுவின் பு‌திய நாவல் பற்றி மாதவராஜின் ஒரு விமர்சனம் படித்தேன். புஷ்பா தங்கதுரையை ‌விட மோசம் எ‌ன்று சொன்னது கொஞ்சம் ஓவர். இன்னும் கொஞ்சம் இந்த நாவல் பற்றி ஆழ்ந்து விமர்சனக் கருத்துகளை முன் வைத்திருக்கலாம், நாவல் மோசமாகவே இருந்தாலும் கூட. உதாரணமாக, சாந்தாமணியும் இன்ன பிற காதல் கதைகளும் நாவலின் முதல்பகுதி 1997-ல் நடக்கிறதா அல்லது 1988-ல் நடக்கிறதா எ‌ன்று எனக்கு குழப்பம். நாவல் ஆசிரியரே அவசரத்தில் குழம்பியிருக்கிறார். காதலுக்கு மரியாதை படம் பற்றி தகவல் வரு‌கிறது (1997) பிறகு பள்ளி மாணவர்கள் தாங்கள் பார்த்த விக்ரம் படம் (1988) பற்றியும் வசனம் எழுதிய சுஜாதா பற்றியும் பாலகுமாரன் நாவல்கள் பற்றியும் பேசுகிறார்கள். உண்மையில் 1997-ல் பள்ளி மாணவர்கள் எல்லாரும் கேபிள் டி.வி இலக்கியம் பக்கம் வ‌ந்து விட்டார்கள். பாலகுமாரன் ஆன்மீக நாவல்கள் எழுத ஆரம்பித்துவிட்டார்.
இ‌து போன்ற கவனக்குறைகளை சுட்டிக்காட்டியிருக்கலாம்

நண்பர்கள் பலர் தங்களுக்குப் பிடித்த வலைப்பதிவுகளை தந்திருக்கின்றனர் அவைகளை பார்ப்போம்.

பா.ராஜாராம்:

இன்று வாசித்த சரவணன் - சாரதியின் புணரும் காலம் என்னும் இந்த கவிதை பிடிச்சிருந்தது. சில கவிதைகளை சிறு குறிப்பு கூட கொடுக்காமல் அனுபவிக்க விட்டுக்கொடுக்க வேணும்.அப்படி,குறிப்பின்றி விடுகிறேன்.

ஜெயமார்த்தாண்டன்:

சென்ற வாரத்தில் என்னை கவர்ந்த பதிவுகள் இவை. சொல்வனம் இணைய இதழில் ஆர்.எஸ்.நாராயனண் எழுதிய “தாவரங்களுடன் பேசிய அற்புத விஞ்ஞானி – கார்வர் . ஜார்ஜ் வாஷிங்டன் கார்வர் என்ற இயற்கைவளத்தையும் ,மண்னையும் நேசித்த ஒரு அமெரிக்க வேளாணமை விஞ்ஞானியின் வாழ்வையும் அவர் வாழ்வின் சாரத்தையும் முன்வைக்கிறது.

ஹிரோஷிமா,நாகசாகியின் அழிவிலிருந்து தப்பியவர்களிடம் நேரடியாக பேட்டிக்கண்டு தொகுத்திருக்கும் ராபர்ட் ஜங்க் என்பவரின் Children of Ashes என்ற புத்தகத்தை அறிமுகம் செய்கிறது தமிழச்சியின் இந்த பதிவு

சமீபத்தில் நான் படித்த நல்ல அங்கத சிறுகதை சுரேகாவின் “எனக்கு ஏன் இந்த தண்டனை? ”அவரின் நடையும்,சமகால அரசியலுடன் நாம் இந்த சிறுகதையை பொருத்திப்பார்க்க முடிவதும் இந்த கதையை முக்கியமாக்கிவிடுகிறது.

மாயுரம் வேதநாயகம் பிள்ளையைப்பற்றிய அரிய தகவல்களை தருகிறது
முனைவர் நா.இளங்கோவின் இந்த பதிவு.

ஜோதி:

இன்று படித்த அகிலனின் "My name is Agiilan and I am not a terrorist" மை நேம் இஸ் கான் திரைப்படத்துடன் ஒத்துப்போதும் தஙகளது வாழ்க்கையின் சங்கடங்களை தெரிவிக்கிறார். உண்மையான இந்த விடயங்களை படிக்கும் பொழுது மனது கனக்கச்செய்கிறது

லாவண்யா:

உமாகதிர் அவர்களில் பிரிவுதுயர் கவிதை அருமையாக இருந்தது.

//வெட்டப்படாத நகங்களைப்போல உனது
நினைவுகள் அசௌகரியப்படுத்துகின்றன// அழகான படிமம் இது.

மண்குதிரையின் ரொம்ப சந்தோசமாக இருக்கிறது கவிதை பிடித்திருந்தது

//ஒழுகும் வெயிலைப் பருகுகிறேன்// இது வித்தியாசமான வரிகளாக பட்டது.

துரான் குணாவின் ஆத்மாநாம் இருந்த மருத்துவமனை கவிதை பிடித்திருந்தது

//நான் எரிந்துகொண்டிருக்கிறேன்
சூரியன் அணைந்துகொண்டிருக்கிறது// கவர்ந்த வரிகள்

மா.கார்த்திகைப் பாண்டியன்:

தமிழின் இலக்கிய ஆளுமைகளை அறிமுகம் செய்து, அவர்களின் படைப்புகளை வெளியிடுவதற்காகவே இயங்கி வருகிறது "அழியாச் சுடர்கள்" என்ற வலைத்தளம். உபபாண்டவம் குறித்த எஸ்.ராமகிருஷ்ணனின் இந்தப் பேட்டி எனக்கு மிகவும் பிடித்து இருக்கிறது. புத்தகத்தின் மீதான எதிர்வினைகளும், அதற்கு எஸ்ரா கொடுக்கும் விளக்கங்களும் மிக முக்கியமானவை. மகாபாரதத்தோடு தொடர்புடைய புத்தகங்கள் பற்றிய தகவல்களும், மகாபாரதம் எப்படி ஒவ்வொருவரின் கண்ணோட்டங்களிலும் வித்தியாசப்படுகிறது என்பதை படிக்கும்போது ஆச்சரியமாக இருக்கிறது. கன்னித்தன்மை குறித்த எஸ்ராவின் கருத்தும் கவனத்தை ஈர்க்கிறது.

"சாங் ஆப் ஸ்பாரோஸ் " என்கிற மஜீத் மஜிதியின் இரானிய படம் பற்றிய முரளிகுமார் பத்மநாபனின் பதிவும் அருமை.

ராம்ஜி யாஹூ:

இன்று நான் ஜ்யோவ்ராம் சுந்தரின் பெயர்களைப் பற்றிய பதிவு படித்தேன். அவரது வலைப்பக்கத்தில் கண்ட இந்த ஆங்கில இடுகை மிகவும் சுவையாக இருந்தது.

எனது கவனம் அறிவன் மற்றும் முத்துகுமாருக்கு நடந்த உரையாடல், கருத்து வேறுபாடு அல்ல:

சிறு குழந்தைகள் முன் பெரியவர்கள் முத்தமிடலாமா

கதிர்:

ஈழத்துத் தமிழை மிகச்சிறந்த அவதானிப்போடும், காதல் மேல் இருக்கும் உண்மையான காதலை வெளிப்படுத்திய நண்பர் பழமைபேசியின் யாழினி இடுகை. படித்தவுடன் யாழினி கதாபாத்திரம் மனதில் சிம்மாசனமிட்டு அமர்ந்தது. வாழ்க அந்தப் பெண் என்று மனது நெகிழ்ந்தது.
காதலுக்கு காதலைவிட வேறு எதை பரிசாக கொடுக்க முடியும்.புனைவு போல் தோன்றினாலும், அந்த நிகழ்வு உண்மை என்று உணர்ந்த போது, நெகிழ்ந்து போனது உண்மை.

பாபு:

நேற்று படித்த ஒரு கவிதை - நாட்டின் பேராண்மையும் ஈனவெங்காயமும்..!!! இரண்டாம் ஆண்டு படிக்கும் ஒரு மாணவியின் அறச்சீற்றம்... பாடம் சம்பந்தமட்டுமல்லாமல் எழுதுவதற்கும், ஆசிரியர் மாணவர்களை ஊக்குவிப்பது மகிழ்ச்சி அளிக்கிறது. மாணவி, ஜெ.நிவேதாக்கு வாழ்த்துக்கள்!

காதியைப் பற்றி எழுத்தாளர் பா.ராகவன் (பாரா) மதனசுந்தர ஜவ்வாது பாகவதர் மிகவும் சுவாரிசியமானது. எல்லாமே வியாபாரமான இந்த உலகில் அரசாங்கம் காதிக்கும் 'கொஞ்சமே கொஞ்சம்' விளம்பரம் செய்தால் நல்லா இருக்கும்!

L.X.ஜெரோம் சமீபத்தில் எழுதின 'VALENTINE Hijacked… இடம் மாறும் மையமும் ஓரங்களும்...' அருமையான பகிர்வு!

சந்தனமுல்லை:

பூங்குழலியின் என்னவென்று சொல்வது ? இடுகையை வாசித்தேன்.! எனக்கும் என்ன சொல்வதென்று தெரியவில்லை.ஆனால், அனைவரும் வாசிக்க வேண்டிய இடுகை என்று மட்டும் தோன்றுகிறது!

jothi.mraj@gmail.com

vadakaraivelan@gmail.com

வாடாத பக்கங்கள் - 3

2010-02-19T20:45:00.001-08:00

இந்த வலைப்பக்கத்தில் ஃபாலோயர்கள் இணைகிற வேகத்துக்கு, கருத்துக்களும், பகிர்வுகளும் வரவில்லையென்பதை வருத்தத்துடன் தெரிவித்துக் கொள்கிறோம்.

இந்த வலைப்பக்கம் உங்களுடையது. உங்களுக்குப் பிடித்தமான பதிவுகளை இங்கே நீங்கள் அறிமுகப்படுத்தலாம். ஒரு பதிவு குறித்த உங்கள் கருத்துக்களை வெளிப்படையாகத் தெரிவிக்கலாம். ஆரோக்கியமான உரையாடலை துவக்கலாம். அதற்கான வெளி இது.

இல்லையென்றால் ஒருசிலரே மீண்டும் மீண்டும் பேசுகிற கட்டாயம் வந்து சேரும்.

ஒன்று மட்டும் நிச்சயம். பேசுவதை நிறுத்துவதாய் இல்லை.

சரி. இன்றைக்கு நம் நண்பர்கள் சிலர் தங்களுக்குப் பிடித்த பதிவுகளை இங்கே பகிர்ந்து கொள்கிறார்கள்.

ஆடுமாடு:

மூலதனமான மொழியை உருட்டி பிழியும் லாவகம் வந்துவிட்டால் கவிதை கைக்குள் அகப்பட்ட கலை. வாழ்வின் எல்லா தருணங்களையும் கவிதை ஆக்கும் சக்தி சிலருக்கு உண்டு. அதெல்லாம் கவிதையாகுமா என்கிற மேதாவிதனங்களுக்கும் இங்கு பஞ்சமில்லை. அந்த வகையில் மிகுந்த சொற்சிக்கனத்தோடும், எளிமையாகவும் கவிதை படைப்பவர் முபாரக். அவரது எல்லா கவிதைகளுமே ஏதாவது ஒரு மெல்லிய உணர்வை, தாக்கத்தை நம்முள் விதைத்து விட்டு போகும் ஆற்றல் கொண்டவை. அவரது, 'சொற்களை தின்னும் பூதமும்' அப்படித்தான்.

க.பாலாசி:

கண் குறைபாடுகள், கண்ணாடி அணிவதிலிருந்து விடுதலை - அமைதியாய் ஒரு புரட்சி என்னும் இந்த இடுகை மிக நல்ல பகிர்வு... அன்பர் ஆரூரன் விசுவநாதன் தனது மகனுக்கு செய்த கண் சிகிச்சைப்பற்றி எழுதியிருக்கிறார். பலருக்குத் தெரிந்திருந்தாலும் இன்னும் சிலருக்காவது இந்த விடயம் சென்றடையவேண்டும் என்ற நோக்கின்பொருட்டு இதை பரிந்துரை செய்கிறேன்.

பா.ராஜாராம்:

ரொம்ப பிடிச்ச கவிதை ஒன்று வாசித்தேன்.அது க.பாலாசியுடையது.
முக்கல் முனகல் இன்றி, பிறந்த குழந்தை மாதிரி இருக்கு இந்த கவிதை.

இன்னொன்னு toto-வுடையது. கவிதைகளுக்கு என சந்தோசமாய்,நிறைவாய் இருக்கு இவரின் தளம்.

மேலும் இரண்டு நல்ல கவிதைகள். ஒன்று ராகவனின் நதியானவள். இரண்டு அமித்தம்மாவின் பெற்றவள். இரண்டும் ஒன்றுதானோ? :-)

ராகவன்:

நான் நேற்று படித்த " தண்டோராவின் - வாழைப்பூ வாசம்" என்ற சிறுகதையும், எட்டயபுரத்தில், கலாப்ரியா எழுதிய untitled போஸ்ட், ஆச்சியை பற்றிய பதிவும் என்னை ரொம்பவும் பாதித்தது.

குப்பன் யாஹூ:

இன்று நான் வாசித்தது லேகா -யாழிசை ஒரு இளகிய பயணம்- இல் தங்க ராணி குறித்த பதிவு. நாடகங்கள் குறைந்து வரும் இந்தக் காலக்கட்டத்தில் நாடகம் குறித்த புத்தகத்தின் பதிவு இது.

ஜெயமோகன் எழுதி உள்ள சிற்பகலைக்கு ஒரு இழப்பு என்ற பதிவு. அதில் இன்றும் நேற்றும் உள்ள ஆட்சியாளர்கள் பாறைகளையும், மணல் வெளிகளையும், பணத்திற்காக கொள்ளை அடிப்பது குறித்து பதிந்து உள்ளார்.

மாதவராஜ்:

என்.விநாயக முருகனின் ‘சில்லறை’ சிறந்த பகடி. ‘குபீர்’ சிரிப்பு என்று சொல்லப்படும் வார்த்தைக்கான அர்த்தம் கவிதையின் கடைசிவரிகளில் இருக்கிறது.

கே. பாலமுருகனின் ‘வானமும் சில மழைக்காலங்களும்’ சிறந்த வாசிப்பனுபவம் கிடைக்கும். // வாளியின் நீர் மேற்பரப்பில் எப்பொழுதும் மிதக்கும் ஒரு வானத்தை// என்னும் இந்த வரிகள் அடங்கிய, ஒரு பழங்கிணறு பற்றிய சித்திரமும், நினைவுகளும் விரியும்.

கென் எழுதிய ‘இன்னும் இன்னுமாய் ஒரு காதல் கதை’ மனதில் நின்றது. கரைய வைக்கிற கற்பனை. கலங்க வைக்கிற நிஜம். கதையின் ஆரம்பத்தில் இருக்கிற அவரது கவிதை...... அடேயப்பா!

பைத்தியக்காரன் எழுதிய ‘சூன்யப்புள்ளியில் பெண்’ நாவல் விமர்சனம் முக்கியமான பகிர்வு. சொல்லப்பட்ட விதம் அருமை என்றாலும் சில விமர்சனங்கள் இருக்கின்றன. பின்னூட்டத்தில் தெரிவிப்பேன். பதிவை கதையில் வரும் இந்த வாக்கியத்தைச் சொல்லி முடிக்கிறார்.

''எந்தவொரு பெண்ணும் குற்றவாளியாக இருக்கவியலாது. குற்றவாளியாக இருப்பதற்கு ஒருவர் ஆணாக இருந்தாக வேண்டியது மிகவும் அவசியம்...''

இதைப் படித்துவிட்டு- நண்பர் ஆதிமூலக்கிருஷ்ணனின் ‘திரிபுகளின் வேர்’ கதையைப் படித்தபோது சிரிப்பு வந்தது. கூடவே வருத்தமும். எவ்வளவு முரண்பாடு!

நண்பர்கள் இங்கு குறிப்பிட்டு இருக்கிற பதிவுகளைப் பற்றிய கருத்துக்களை பின்னூட்டங்களில் தெரிவியுங்கள். தங்களுக்குப் பிடித்த பதிவுகளை கீழ்க்கண்ட மெயில்களில் தெரிவியுங்கள்.

jothi.mraj@gmail.com

vadakaraivelan@gmail.com

வாடாத பக்கங்கள் - 2

2010-02-18T21:36:00.001-08:00

வாடாத பக்கங்களின் முதல் பக்கம், உங்களால் உற்சாகமாக எழுதப்பட்டு இருக்கிறது. பல நண்பர்கள், தாங்களும் இந்த வாடாத பக்கங்களுக்கு பங்களிப்பு செய்வதாகச் சொல்லி இருக்கிறார்கள். இது ஒரு கூட்டு முயற்சியாக பரிணமிக்க வேண்டும்.

இதன் நோக்கம் அறிந்து, பலரும் ஆதரவு தெரிவித்திருக்கிறார்கள். ஒரேநாளில் 29 followerகள் இணைந்திருப்பது அதைத்தான் காட்டுகிறது. கூடவே எதிர்பார்ப்புகளையும் உணர்த்துகிறது.

வடகரைவேலன் அவர்கள், இந்தப் பக்கங்களுக்கான 10 விதிமுறைகளை உருவாகித் தந்திருக்கிறார். குறைகளையும், பலவீனங்களையும் தவிர்ப்பதற்கும், சரியான திசையில் பயணிப்பதற்கும் அவை நிச்சயம் கைகாட்டும். அவை இந்த வலைப்பக்கத்தில் ‘உங்கள் பக்கங்கள்’ என ஒரு விட்ஜெட்டாக நிரந்தரமாக இருக்கட்டும்.

நேற்று நம் நண்பர்கள் சிலர், அவர்கள் வாசித்த பதிவுகளில் தங்களைக் கவர்ந்தவைகளைச் சுட்டிக் காட்டி இருக்கிறார்கள்.

லேகா:

இன்று நான் ரசித்து வாசித்த பதிவு ,சுரேஷ் கண்ணனின் "லா ஸ்ராடா - துயரத்தின் காவியம்"

நல்லதோர் அறிமுகம்.சோகத்தின் கோர முகத்தை காவியமாய் திரையில் கொண்டு வந்த படைப்புகளில் மிக சிறந்தது இப்படம் என்கின்றார். இப்படத்தின் நாயகியாய் நடித்த நடிகை குயிலிட்டா மசினா குறித்த எஸ்.ராவின் கட்டுரை ஒன்று, படம் பார்க்கும் ஆவலை தூண்டுவதற்கு மேலும் ஒரு காரணம்.

பா.ராஜாராம்:

இன்று வாசிக்க வாய்த்த நர்சிம்மின் "என்னுள் விலகும் நான்" எனும் கட்டுரை மிக பிடித்திருந்தது.அந்த மொழி வசீகரம்,சிந்தனை,பேசும் தொணி அழகாய் வந்திருக்கு.

ஜோதி:

திரு சுரேகா அவர்களின் இந்த பதிவு "எனக்கு ஏன் இந்த தண்டனை"
இராமாயணத்தில் சுக்ரீவ நாட்டு ப்ரஜைகள் பேசுவது இன்றைய உலக நடப்பை பேசுகிறது.

கும்க்கி:
மிகப்பிடித்த வலைப்பக்கம் ஒன்றுண்டு. பேச்சியம்மை - நாஞ்சில் நாடன்.

Deepa:

சந்தேகமே இல்லை. இன்று படித்ததிலேயே மிகப் பிடித்தது ரிஷபனின் சிறுகதை தான். அதிலும் அவர் நெகட்டிவான கேரக்டரை first person -ல் சொல்லி இருப்பது பாராட்டத் தக்கது.

kapiish:

படித்ததில் பிடித்த பதிவு/இடுகை: இளம் வயதில் வரும் `ஹார்ட் அட்டாக்’
இந்த இடுகையில் இருப்பது நிறைய பேருக்குத் தெரிந்திருந்தாலும், இதை வாசிக்கும்போது, மன அழுத்தம்,கோபத்தைக் குறைச்சுக்கத் தோணும்.(அப்படின்னு நினைக்கறேன்)நிறைய பேர் ப்ரஷர் குக்கர் மாதிரி அழுத்ததோடவே இருக்காங்க. அவங்களுக்கு உபயோகப்படலாம் //மற்ற இதயநோயாளிகளை விட `டென்ஷன் பார்ட்டிகளை’ நான்கு மடங்கு அதிகமாக இதயநோய் தாக்கும்//

மாதவராஜ்:

நிலாரசிகனின் ‘நதி’ என்னும் கவிதை அற்புதமாய் வந்திருக்கிறது. அகநாழிகையின் ’பிள்ளை விளையாட்டும்’ அருமை. இரண்டுமே எளிய வார்த்தைகளில் மிகப் பெரும் விஷயங்களைச் சொல்கின்றன.

பா.ராஜாராமின் விளக்கில் விசும்பும் பூதம் கவிதை வழக்கம் போல அற்புதமாய் வந்திருக்கிறது. அதில் அம்பிகாவின் பின்னூட்டத்தையும் ரசித்தேன்.

‘வண்ணநிலவனின் ‘ரெய்னீஷ் ஐயர் தெரு’ குறித்த வாசிப்பு அனுபவத்தை பகிர்ந்திருக்கும் ஜெயமார்த்தாண்டனின் பதிவு நன்றாக இருக்கிறது. நாவலில் இருந்து மீளமுடியாமல் தவிக்கும் வாசகனை எழுத்தில் பார்க்க முடிகிறது.

ஆடுமாடு என்கிற பேரில் ஏக்நாத் அவர்கள் எழுதிய காடு பற்றிய பதிவுத் தொடர் - 9 படித்தேன். மொழியின் வளமையும், நாம் அறியாத வாழ்க்கையும் பூத்துக்கிடக்கும் வெளி இது. அள்ள அள்ளக் குறையாமல், காடு அலை அலையாய் நெஞ்சில் முட்டுகிறது. வலைப்பக்கத்தில் நான் நேசிக்கும் எழுத்துக்கள் இவருடையதும் ஆகும்.

இந்தப் பதிவுகள் குறித்த தங்கள் கருத்துக்களை இங்கு பின்னூட்டத்தில் தெரிவியுங்கள். உங்களுக்குப் பிடித்த பதிவுகளை சிறுகுறிப்போடு கீழ்க்கண்ட மெயில்களுக்குத் தெரிவியுங்கள்.

jothi.mraj@gmail.com
vadakaraivelan@gmail.com

வாடாத பக்கங்கள் - 1

2010-02-17T21:23:00.001-08:00

நண்பர்களுக்கு வணக்கம்.

வலைப்பக்கங்களில் எழுதுபவர்களுக்கும், வாசிப்பவர்களுக்குமான உரையாடல், அவரவர் வலைப்பக்கங்களில் மட்டுமே நிகழந்து கொண்டு இருக்கின்றன. குறிப்பிட்ட ஒரு பதிவரின், ஒரு பதிவைப்பற்றியதாக அந்தப் பின்னூட்டங்கள் இருக்கின்றன. பலசமயங்களில் அவை ஒப்புக்கோ அல்லது மேம்போக்காகவே இருப்பதையும் காண முடிகிறது. உள்ளார்ந்த ஈடுபாட்டுடன் எழுதப்படும் பல முக்கியப் பதிவுகள் கவனிப்பாரற்றுக் கிடக்கின்றன. அவர்களது வலைப்பக்கங்கள் அடையாளமற்றுப் போகின்றன.

பதிவுகளைப் பற்றி, வலைப்பக்கங்களைப் பற்றி உரையாடும், ஓரளவுக்கு உயிரோட்டமுள்ள ஒரு பொதுவெளி வேண்டும் என யோசித்துக் கிடந்ததில் என் சிற்றறிவுக்கு எட்டியது இது. இங்கு யாரும் யாருக்கும் ஓட்டுகள் போட வேண்டியதில்லை. அவரவர்கள் படித்தது, அதில் பிடித்தது, புரிந்தது, புரியாதது என யாவற்றையும் பகிர்ந்து கொள்ளலாம். விவாதிக்கலாம். அப்படி ஒரு ஏற்பாட்டோடும், நோக்கத்தோடும்தான் இந்த வலைப்பக்கம் ஆரம்பிக்கப்படுகிறது.

இந்த ‘வாடாத பக்கங்களின்’ ஒவ்வொரு நாளின் பதிவிலும்-
வலைப்பக்கங்களில் முந்தின சில நாட்களில் படித்தது, அவைகள் குறித்த கருத்துக்களைத் தெரிவித்து அன்றைய உரையாடலை ஒருவர் ஆரம்பித்து வைக்க வேண்டும். பதிவுகளில் வந்த நல்ல, ஆரோக்கியமான பின்னூட்டங்கள் பற்றியும்கூட அவர்கள் தெரிவிக்கலாம். மற்றவர்கள், அது குறித்து தங்கள் கருத்துக்களைச் சொல்லலாம். அல்லது தாங்கள் வாசித்ததையும், அதில் பிடித்தமானவைகளையும் பின்னூட்டங்களில் தெரிவிக்கலாம்.

இங்கு பதிவும், பின்னூட்டங்களும் சம மரியாதையும், அடையாளமும் கொண்டவை என்னும் புரிதல் வேண்டும்.

மொத்தத்தில்- நல்ல, முக்கியமான பதிவுகள் அடையாளம் காணப்படும். அவை வாடாத பக்கங்களாக நிலைக்கவும் செய்யும். ஒரு கருத்துக்கூடமாகவும் இருக்கும். ஒரு reference போலவும் இந்த வலைப்பூ உருப்பெறும்.

இந்த முயற்சியை மேலும் செழுமைப்படுத்தும், வளர்த்தெடுக்கும் சிந்தனைகளை எதிர்பார்க்கிறேன்.

இந்த வலைப்பூவுக்கு இன்னொரு Author ஆக வடகரைவேலன் அவர்கள் இருக்கச் சம்மதித்து உள்ளார். அவருக்கு நன்றி.

யாரும், தங்கள் விருப்பங்களைப் பதிவாக தெரிவிக்க முன்வராவிட்டால் நானே அக்காரியத்தைத் தொடர்ந்து செய்யக்கூடிய அபாயமும் உண்டு. அது ஆரோக்கியமாகவும் இருக்காது. அதைத் தவிர்ப்பது உங்கள் கையில்!

இந்த வலைப்பூவை வாடாமல் இருக்கச் செய்வதும் உங்கள் கையில்.

ஆரம்பிப்போம்!

_____________________________________________________________

17.2.2010 அன்று நான் படித்தவை:

சில பாராட்டுகள் – ஆதிமூலகிருஷ்ணன்
Outsourced - திரைவிமர்சனம் - நிலா ரசிகன்
Alternative Schools 'n' Mainstream Schools – சந்தனமுல்லை
இவனே திரையிடும் இவன் படம் - பா.ராஜாராம்
கேபிள் சங்கரின் சிறுகதைத் தொகுப்பு - T.V.ராதாகிருஷணன்
தெலுங்கானா : புதைந்துள்ள உண்மைகள் – வினவு
டாக்டர் ருத்ரன் அவர்களுடன் ஒரு சந்திப்பு - பாகம் 2 – தீபா
வீடென்று எதனை சொல்வீர்... – ராகவன்
கிளிஞ்சல்கள் பறக்கின்றன... - கார்த்திகா வாசுதேவன்
பகிர்தல் (17.2.2020) - ஈரோடு கதிர்
எல்லைகள் – அனுஜன்யா
தைப்பூசமும்... ஆரெம்கேவியும்.. – அமைதிச்சாரல்
மனிதம் – ரிஷபன்
குரு - என்.விநாயகப் பெருமாள்
சு.வேணுகோபாலின் "கூந்தப்பனை" – லேகா
அன்பெனும் அதி பயங்கர ஆயுதம் – பரிசல்காரன்
பரிசலின் புத்தகம்..ஒரு பறவையின் கண்ணோட்டத்தில் - T.V.ராதாகிருஷணன்

என் கருத்துக்கள்:

நிலாரசிகனின் ‘Outsourced’ படம் பற்றிய விமர்சனத்தை விட, படத்திற்கான அறிமுகம், சுவையானது.
சந்தனமுல்லை அவர்களின் பதிவு இன்றைய கல்வி குறித்த மாற்றுச் சிந்தனைகளை ஆராய்கிறது. மீறமுடியாத நிர்ப்பந்தங்களையும் சுட்டிக்காட்டுகிறது.
காத்திகா வாசுதேவன் அவர்கள் ‘கிளிஞ்சல்கள் பறக்கின்றன’ என வலைப்பதிவுகளிலிருந்து தொகுக்கப்பட்டுள்ள கவிதைத் தொகுப்பு குறித்த தனது பார்வையை வெளிப்படுத்தி இருக்கிறார். பின்னூட்டத்தில் அகநாழிகை, பாராட்டுக்களோடு, அத்தொகுப்பில் தான் காணும் குறையையும் சுட்டிக்காட்டி இருக்கிறார்.
ரிஷபனின், ‘மனிதம்’ அதிர்வுகளை ஏற்படுத்தும் சிறுகதை.
அன்பை ‘அதி பயங்கர ஆயுதம்’ என பரிசல்காரன் சொல்லி இருப்பது எனக்கு பிடிக்கவில்லை. (தலைப்பு மட்டும்தான் பிடிக்கவில்லையென்று சொன்னேன்)
டாகடர் ருத்ரன் அவர்களுடனான பேட்டியில், பேட்டியின் கேள்விகள் மேலும் ஆழமான விளக்கங்களைக் கோருவதாக இல்லை. இருப்பினும் தீபா, முல்லை அவர்களின் முக்கிய முயற்சி இது.
வினவின் பதிவு ‘தெலுங்கானா’ குறித்த வரலாற்றுப் பின்னணியை அவர்களுக்கே உரித்த தொனியில் விளக்கி இருக்கிறது.
அனுஜன்யாவின் எல்லைகள், மீன் தொட்டிக்குள்ளிருக்கும் மீன் குஞ்சுகளைப் பற்றிப் பேசாமல், மனிதனைப் பற்றிப் பேசுவதாக எனக்குப் பட்டது.
ராகவனின் கவிதை முக்கியமானது. பலரால் இவரது கவிதைகள் கவனிப்பு பெறாமல் போகின்றன என்பது எனது ஆதங்கங்களில் ஒன்று. வீட்டுச்சுவர்களைப் பற்றிய கடைசி இரண்டு பாராக்களும் நம்மை மீளமுடியாமல் செய்கின்றன. அதன் துடிப்புகளை நீங்கள் உணர முடியும்.
பா.ராவின் கவிதைக்கு வந்த பின்னூட்டங்களில் வெளிப்படையாக தீபாவும், முரளிகுமார் பத்மநாபன் அவர்களும் புரியவில்லை எனச் சொல்லி இருக்கிறார்கள். தலைப்போடு சேர்த்துப் படிக்கும்போது புரியமுடியும். கனவிலிருந்து நனவுக்கு மீளும், மீண்டு புதிதாய்த் தொடங்கும் சொற்சித்திரமாக எனக்குத் தோன்றியது.
சு.வேணுகோபாலின் "கூந்தப்பனை" படித்திருக்கவில்லை. லேகாவின் புத்தக விமர்சனம் வாசிக்கத் தூண்டுகிறது. விமர்சனங்களை இன்னும் விரிவாக எழுதலாமே என எப்போதும் ஒரு கருத்து எனக்கு உண்டு.
விநாயக முருகனின் ‘குரு’ படித்து முடிக்கவும் புன்னகை தோன்றும்.

தங்களுக்கு விருப்பமான பதிவுகளை பின்ன்னூட்டமாகவும் தெரியப்படுத்தலாம். அல்லது கீழ்க்கண்ட மெயில்களுக்கு தெரியப்படுத்தினால், அடுத்த நாள் பதிவில் குறிப்பிடலாம்.

jothi.mraj@gmail.com

vadakaraivelan@gmail.com

வாடாத பக்கங்கள்

வாடாத பக்கங்கள் - 8

வாடாத பக்கங்கள் -7

ஸ்டெல்லா புரூஸ் கவிதைகள்

தண்டவாளம் விட்டு இறங்காத ரயிலும், செவத்திக் கிழவியின் கனவும்

அறிவிப்பு - 1

வாடாத பக்கங்கள் - 6

1. குடை பிடித்தவனைக் கொன்றுவிட்டார்கள் (நாவிஷ் செந்தில்குமார்)

வாடாத பக்கங்கள் –5

வாடாத பக்கங்கள் -4

வாடாத பக்கங்கள் - 3

வாடாத பக்கங்கள் - 2

வாடாத பக்கங்கள் - 1